नक्कली मेजरको यस्तो सम्म चर्तीकला

ललितपुर ।  चापागाउँ प्रहरी वृत्तमा शुक्रबार साँझ ७ बजेतिर निकै ठूलो हल्लीखल्ली मच्चियो । वृत्तका प्रमुख तथा डिएसपी कृष्णराज ओझा खाना खादै थिए । उनको अगाडि एक जना इन्स्पेक्टर स्यालुट ठोक्दै भने, ‘मेजर साबले पिएर गेटबाहिर होहल्ला गर्दै हुनुहुन्छ ।’ खानाको थाल छाडेर डिएसपी ओझा जुरुक्क उठेर घटनास्थलतिर दौडिएर गए । बाहिर सुरक्षा चेकजाँचमा सेनाले बोल्ने कोड भाषा नै प्रयोग गरेर ‘मेजर’ भनिएका गोदावरीका सुरज विष्ट कराउँदै थिए, ‘मलाई चिनिनस् ? म कसैलाई  छोड्दिनँ । यहाँको इञ्चार्जसँग मेरो दोस्ती छ, उसलाई यता बोलाएर ल्या ।’ यति कुरा सुनेपछि डिएसपी ओझाले ती ‘मेजर’ ल लाई केहि प्रहरी खटाएर पक्रिन लगाए । कार्यकक्षभित्र लगेर सोधपुछ गर्दा अन्ततः उनी नक्कली मेजर भएको खुल्यो । यति कुरा खुलेपछि  यो घटना थप चर्चाको विषय बनेको छ ।

नक्कली मेजरलाई समातिएपछि सेनाको एउटा टोली १० बजेतिर चापागाउँ वृत्त पुगेको थियो । ती विष्टलाई सोधपुछ गरेर हालको सेवामा उनी नरहेको खुल्यो । तर, उनी सेनामा एक वर्ष कार्यरत रहेको खुल्यो । त्यसपछि सेनाको टोलीले विष्टलाई आफ्नो मान्छे होइन भनेपछि चापागाउँ प्रहरी वृत्तमै हिरासतमा छाडेर हिँडे । सेना स्रोतले भन्यो, ‘यी विष्ट २०६२ सालतिर एक वर्ष सेनामा थिए । पछि भगौडामा गनिएपछि बर्खास्त गरिएको हो ।’ बर्खास्तपछि विष्टले सेनाको पोशाक दुरुपयोग गर्दै आएको खुलेको छ । विष्टको अनुसन्धानमा जुटेको प्रहरीले उनी जग्गा कारोबारमा लागेको र कसैको पैसा फसेको भए उठाइदिने काममा सक्रिय भएको पाइएको छ । पैसा उठाउन जाँदा मेजरको बर्दीमै जाने गरेको अनुसन्धानमा खुलेको छ ।

‘केही समय अघिसम्म उनै नक्कली मेजरको चापागाउँ वृत्तमा आउजाउको थलो बनेको थियो ।’ वृत्तका प्रहरी स्रोतले जनआस्थालाई भन्यो, ‘तत्कालीन केही डिएसपी साबहरूसँग भेट्ने र चिया पिउने गरेका उनी पटक–पटक आइरहन्थ्यो ।’ एकपटक तत्कालीन डिएसपीसँग कुरा गरिरहँदा गोदावरीका मेयर गजेन्द्र महर्जन पनि आइपुगे । ती मेजर विष्टले मेयर महर्जनकै अगाडि भने, ‘आज मेयरसाब यहीँ हुनुहुन्छ । मैले भन्नै पर्छ, चापागाउँ अलिकति संवेदनशील क्षेत्र हो । सुरक्षामा विशेष ध्यान दिनुहोला । केही सहयोग चाहिए म माथि कुरा गरौंला ।’

यता, विष्टले पारिवारिक सम्बन्धभित्र पनि ‘मेजर नै हुँ’ भन्दै दुई श्रीमतीलाई झुक्याएर राखेको पाइएको छ । ‘नक्कली मेजरले पोष्टिङ र सरुवा भयो भन्दै दुई श्रीमतीको घरमा आतेजाते गरेको पाइयो ।’ प्रहरी स्रोतले भने, ‘उनको बसाइ ६ महिना चापागाउँ र ६ महिना विशंखु नारायणमा हुने गरेको छ ।’

महानगरीय प्रहरी परिसर ललितपुरका प्रमुख एसएसपी टेकप्रसाद राईले नक्कली मेजरका सम्बन्धमा सूक्ष्म अनुसन्धान भइरहेको बताउँदै भने, ‘नक्कली मेजर बनेर दश वर्ष युनिफर्मको दुरुपयोग गरेको देखिन्छ । सैन्य तालिम लिएको हुनाले केही प्रहरी झुक्किनु स्वाभाविक पनि हो ।’

LEAVE A REPLY

Please enter your comment!
Please enter your name here